█▓░▓█ Δ █░▓█ حنظله والبحث عن الشهرهـ (2) █▓░█ Δ █▓░▓█

من طرف فتى سدير الخميس يناير 22, 2009 5:38 pm

حنظله والبحث عن الشهره ( الجزء الأول )

وادخل والقى هالحكام واللجنه قبالي ...))

بــدايــه الجزء الثاني ...

ومار اسمع هالتصفيق والتصفير تقل اللي

داخل وائل كفوري مهوب حنضله ...

واجلس على هاك الكرسي اللي لو

جلسو عليه عشرهـ كفاهم من كبره

ومير اشوف هالأستوديو يروع مجمعين هنود

وبنقاليه ورازينهم يقالي جمهور ..

واشوف عثوره هالدخنه وتطيح عيني على

هاك البنقالي اللي اشوفه مهوب صاحي اثره

جاين لمي ويقول( بابا حنظله سوي بربسه )

ودريت ان الدعوه مهيب زينه وقمت ادندن

وانا اتنافض

وتمسك مع احد اللي جالسين يبيني اغنيله اغنيه ابركب الحنطور واتحنطر

وقمت اضف عودي والمرواس وقلت مابقى الا هي وانا جيت ابقوم

وتصير الكارثه والله ويطبون علينا الشرطه

ومكافحه المخدرات والجوازات

وقامو يتناقزون وتجيني ام الركب

ويالله امشي والحقهم واهج معهم ويتلقفوني خمسه من الشرطه والجوازات

وقام واحد يطحلني ويقول جوازك

وقام يفتشني ويطلع من مخباتي كيس

حلتيته موصيتني عليه اميمتي اشريه من الرياض

ويقعد يتنشقه ويكحكح ويجروني للشرطه ...

ويدخلوني التحقيق وانا ماسكن عودي

وداخل واقعد على هاك الكرسي ويتدزابلني

العسكري ويقعد يحقق معي ..

اسمك ؟

حنضله بن دردوم المرتعش !

عمرك ؟

من مواليد سنه السبله..

متى وانت تتعاطى المخدرات ؟

وقمت اسعبل عنده وقمت اتعبر

وياجعلي افطس ان مالي دخل بالسالفه واني

ابي اصير فنان مشهور بس ..

ويقوموني وادخل السجن

وينادون عروش للتحقيق ...

وقمت اندب على حظي التعيس وانا ابدخل

بالسجن واسمع العسكري يقول لا تصكر

الباب جاي واحد للسجن ..

والقى ابو ضرس ساحبينه للسجن والله
وشافني وقام يخمني ويجغفني

وبنفس الوقت يهوش علي ويقول حسبي الله عليكم يالزلايب ..<<< هذا اللي حطيناه بــ نقطه التفتيش

وقلتله السالفه كلها وقال اشوا اني ماجيت معكم والا ناوين تدخلوني قضيه مخدرات ..

ورحموني العسكر ودخلو معي العود والمرواس

وقمت ادق عود وواحد بالسجن معنا يقاله ابو فره

المنبعط !

وطلع الولد محشش له خمس وعشرين سنه مسجون

(ودريت ان الأمور في دبور ...)

والاحظ الولد يحتك معي واشوفه يناظرني من بعيد واقمط العافيه وقمت انتفض

وواحدن جمبي يحك اذنه بأصبع رجله من الفهاوه ..

واقضب ارضي وامسك العود واقول

البارحه مابين صاحي ونايم ... تسني صغيرن يسهر الليل مفطوم

سهرت لين الصبح جتنا علايم ... واللـيل ولا وانهـزم واقبـل اليوم

واشوف ابو فره طاقته العبره وقام البرطم يدودل من الغلقه

اللي فيه ويقوم ويمد يده على المرواس وياخذه ويقوم ويمسك يدي ويقول ..

يالحون العود والا يامجارير الربابه ... اختلف معنى القصيد وضيع الفنان فنه

وقال حنا ياحنظله منقطعين عن الفن وانت جابك الله عندنا تطربنا وتوسع صدورنا ..

وابيك تصير ذراعي اليمين بهالسجن وقال

( حنظله خوي الزعامه والباقي نتفه حمامه )>> بدت الشهره تدهر

وحسيت ان شهرتي بهالسجن وقلت يابو

ضرس انت واحدن بيطلعونك من السجن خلهم

يكلمون شرطتنا بالديرة وانشالله انك بتطلع ..

ونكلم العسكري وقال ابشوف واذا صحيح

هالولد ماله أي علاقه معكم اننا بنطلعه بأقرب

وقت ..

وقمنا نطرب بالسجن وندق عود والزكرت

متسدحين واللي يصفق واللي يطق اصبع

والعساكر متوسدين الجدار ويسمعونا ..

والمهم خلصنا طرب وقعدت انا وعروش وابو

ضرس لحالنا ...

وقلنا وش السوات بهالمصيبه وقال ابو ضرس

انا واحدن بأذن الله ابطلع وانتم انطقو وخل

شهرتك تنفعك ..

وامسك عروش على جمب وقلتله شف

ياعروش حنا الحين توهقنا ودخلنا السجن والله

كتبلنا الشهره فيذا عند هالمساجين

والمحششين وشرايك نبدا شهرتنا هنا ..

ويرد عروش انت شكلك منتب صاحي ياحنضله

شلون لو يدري ابوي وابوك والله ان يغيبون

شمسنا لا ويدرون انها قضيه مخدرات وحنا حدنا

زقاير هنود ابو ريال ويخب علينا ..

وشفت عروش طاقته العبره وقال ضاع

مستقبلك بهالسجون وقام يناشق عندي

وحسيت بتأنيب الضمير

وقمت وخميته وحضنته وصرت اخفف عليه

واواسيه

وبعد القصه المحزنه اللي صارت لنا قلتله

قم بس خلنا نكتب رساله نرسلها مع ابو ضرس

لهلنا ونعلمهم بقصتنا ..

وندور ورقه وقلم وماش مالقينا الا قلم

رصاص مع ابوفره المنبعط يحك فيه اذنه عند

الحاجه وحافته خضرا من الوسخ

وبلشنا بالورقه ونفصخ فنيله واحدن من

هالمساجين قالبن لونها من العرق طالعتن

برتقاليه مع صفار لو تنشقها تسلب تسان يجيه

سرطان بالجهاز التنفسي وسهال لين يموت .

وناخذها واكتب عليها وانا ملتفت ..

( ابي العزيز لقد غدر بأبنك وزج بالسجن ظلمأ

فلا تنصدم بقضيتي قضيه المخدرات ترا والله

اني ماعرف الف زقاره حشيش بس هذا

النصيب وارجو منك انك تجي وتكفلني

وتخليني اطلع من هالسجن بأسرع وقت ولا

تقول لمي تراها ماتمسك لسانها وتخقنا بالديره

وانت خابر حتسي الحريم ..)

تحياتي لشخصك المتفهم ...

ابنك المظلوم .. حنضله بن دردوم !

ـــــــــــــــــــــــــــــــــــــــــــــــــــــــــــــــــــــــــــــــــ

ومن باتسر طلع ابو ضرس وضف عفشه وحط

الفنيله بالشنطه ونسى ياخذ مفتاح الونيت ..

وقلناله الله يحجي عليك ولا تسرع >> اللي

يشوفه معه موتر الحين

احداث ابو ضرس بالديره...

وراح بــ تكسي للديرهـ اللي هي (الغاط) وجع

قلبي

وينصى بيت الوالد ويدخل عليه ولقاه

يتقهوى بالبيت ويسلم عليه وقال وين الونيت

مايدري ان مالنا الا الله ثم هو

بهالديره والا هو بأبليس ... >>> ركزو لي على ابليس لأني خبري به يربط بـ رمضان

ويصفر وجه ابو ضرس وقال عز الله

ياحنضله انك رحت فيها وقال

( حنضله في السجون والونيت بالعيون )

وقال اجلس يابو حنضله انت ماتدري وش صار ..

وطلع الفنيله وهو يرجف وجدعها عند ابو حنظله

وقام وطلع

ويتنشق ابو حنضله مهب ريح يصرع

الأدمي والله وداخ من الريحه وقام واغمى عليه

وعلى طلعه ابو ضرس اثر ام حنظله توها جايه

من الجيران وشافت ابو ضرس هاج وابو

حنضله مغمى عليه وتدق على الأسعاف

ويجون وتبلغ الشرطه

وتقول ابو ضرس هو هو اللي طاقن ابو

حنضله ..

والله ويمسكووووووووون ابو ضرس ...

>>>> انا لله وانا اليه راجعون

من طرف -حمود- السبت يناير 24, 2009 5:17 am

مشكووووووووووووور على المضوع

-حمود-

█▓░▓█ Δ █░▓█ حنظله والبحث عن الشهرهـ (2) █▓░█ Δ █▓░▓█

█▓░▓█ Δ █░▓█ حنظله والبحث عن الشهرهـ (2) █▓░█ Δ █▓░▓█

رد: █▓░▓█ Δ █░▓█ حنظله والبحث عن الشهرهـ (2) █▓░█ Δ █▓░▓█